نحن أبناء البيبسى وأحبائه؟

يمكن

أو غيره؟

بدون مقدمات طويلة ومجعلصة وكلام رط مالوش قيمه. أنا حاسس انى مُستهدف
مُستهدددددددددف
وانا ماشى فى الشارع وانا راكب الميكروباص من عبد المنعم رياض لأكتوبر أو من الإسعاف لبولاق الكرور مرورًا بجامعة الدول أو من أكتوبر لرمسيس أو على الطريق الدائرى مستهدف وانا واقف على محطة المترو وانا محشور جواه وانا على المحطه فى ميدان لبنان وانا واقف فى الجيزة عند بنك القاهرة وانا فى شارع طلعت حرب أو قدام هيلتون رمسيس.. وانا باكل أو بشرب فى أى مكان وانا بتلطش فى مخى وبشترى جرنال وانا بتخبل فى تربتيين تين تين أهلى وبقراه وبفصصه مش عارف ليه .. وانا بنزل من ميكروباص الكيت كات عند مسرح البالون وبمشى لسفنكس.
مستهدف .. مستهدف.. وانا بكلم اصحابى فى التليفون وانا ماشى مع مراتى أو مع أى حد وانا بشترى لبان أو مصاصه لبنت اختى.. مستهــــدف

وانا بتفرج على الزفت التليفزيون على فيلم أو ماتش أو مسلسل أو برنامج أو فى الفراغ .. وانا بسمع نجوم إف إم إأوإذاعة الأغانى وانا بشوف محمد أبوتريكه أو أى لعيب تانى وانا بتفرج على أى دورى أوروبى مستهدف.. وانا بفتح تليفونى أو ببعت رسالة لأى نيله تليفون 010 أو 012 أو 011 مستهدف وانا بفتح الكمبيوتر وانا بدوس على علامة explorer أو بشغل الـ youtupe أو الـ face book أو المدونة
مستهدف وانا بفتح أى رواية لسراماجو أو ديوان لمحمود درويش أو أدونيس أو حتى وانا بفتح ديوانى أنا .
مستهدف. وانا بفتح التلاجه وانا بسحب علبة جبنه أو لانشون أو حاجه ساقعه أو عصير أو حتى إزازة ميه وانا ببص للبوتاجاز أو للمطبقيه وبسحب كبايه عشان اشرب . مستهدف وانا بلبس هدومى وانا ماسك القميص أو البنطلون أو الفنله الداخليه مستهدف وانا ببص للقلم اللى بكتب بيه الكلام ده وانا ببص للمروحه أو للبرفان أو كريم الشعر أومساحة الجزم .. مستهدف
مستهدف وانا بسأل عن اللى باكله إن كان سوسيس أو برجر أو بطاطس مستهدف وانا عند الدكتور وانا واقف فى محل الحلويات أو فى المسمط اللى فى أرض اللواء أو فى الصيدلية بتاعت دكتوره دعاء مستهدددددددفوكأن فى حد بيدرس كل حاجه بفكر فيها حتى قبل ما افكروبيدرس كل خطوه وكل شارع هخطيه سواء ماشى أو راكب أو متشعبط أو واقف أو متنيل على عينى لوحدى أو معايا حد.. بيدرس كل كلمه قلتها أو هقولها .. بيدرس كل حركه .. كل حركه .. مستنينى أضحك أو أبكى أ وأفرح أو احزن من غير صوت .. مستنسنى أتمنى حاجه حتى لو ما كانش ليها وجود ضمن الاختراعات أو السلع اللى على ضهر الأرض مستنينى أحاول أفكر فى الفروق بين أى حاجه والتانيه مستنينى أهمس أو بس يخطر فى بالى أى أى أى حاجه
يا جماعه أنا مستهدف.. عليا التربتيخ والتلمتين والتلبتيك أنا مستهدف

وفى أماكن بحس فيها ده أكتر من أماكن تانيه وشوارع أكتر من شوارع .. يعنى فى شارع السودان وشارع جامعة الدول والزمالك والمعادى ومدينة نصر والمحور و6 أكتوبر كلها بحس انى فى سكنه عسكريه ما الحقش ابص فى أى اتجاه لكن فى حتت تانيه بتق المسألة شويه واحس انى مش مستهدف أوى.
صحيح الواحد ممكن يكون عمل حاجات طين فى حياته لكن ما يستحقش كل ده .. مش كل متر فى الشارع حاسس انى ماشى متحاصر
مش كل ما افتح تليفزيون أو راديو مش كل دقيقه أنا بقيت حاسس ان جزء من فكرة وجودى ضمن الكائنات هو كونى عندى عينين وودنين بشوف واسمع بيهم أى أى أى أى إعلان حتى لو كان عن مصاصى أو باكو لبان ببريزهبقيت حاسس ان شرط من شروط وجودى انى أتابع الإعلان عن أى ششىء وما عنديش حق الرفض

أنا موجود علشان الشركات تعلن وانا اشوف واسمع حتى لو مش هشترى أنا وانت وهى وهو كلنا كلنا موجودين عشان فودافون وموبينيل واتصالات وبيبسى وكوكاكولا وشويبس وإنجوى وجهينه وزبادو ونستله وبيف حلوانى وشيكى دودو وتويست وشيفروليه وأوبل ومرسيدس وجولف وكوك دور وماكدونالدز وكنتاكى وهارديز ووصايه ومؤمن عشان إعمار وداماك والديار القطرية ومدينتى وجاردينيا وحى الأشجار وأملاك وsodic والمصرية للاتصالات عشان بنك عوده وسيتى بنك وabc بنك والبنك التجار ى الدولى ومصر للتأمين والأهليه عشان شريط عمرو دياب الجديد ومحمد فؤاد

ومى كساب وراغب علامه وأليسا ونوال الزغبى عشان شاى ليبتون خرز ودولسيكا ( الكون كونك ) وبوم بوم طاقه بوم ولبنيتا عشان طيران الإمارات واليوبيل الفضى والذهبى والماسى لمصر للطيران عشان فضل شاكر وجورج وسوف وكادبورى وسيارة أحلامك من بنك اسكندريه عشان عرض النجم والنجمه وأفضل شبكه وأحسن إرسال عشان سبرايت وسفن أب ولافاشكرى...................................... مستهدف
وانت كمان مستهدف بالكلام اللى انت قريته ده حتى لو كان كلام فارغ

ده كان إعلان عن شويه من اللى جوايا تجاه الإعلانات وإحساسى بيها. إنت استقبلته كإعلان

أنا آسف ما حبتش أكون متورط لوحدى فى الإحساس ده